Албанија и Грција вчера се договорија да работат на отворање на моментално затворената граница за албанските сезонски работници во грчкиот земјоделски сектор до средината на мај, објави албанскиот премиер Еди Рама.
Рама рече дека разговарал со грчкиот премиер Киријакос Мицотакис за заедничка борба со коронавирусот, заживување на економијата и заедничкиот интерес за сезонска работа.
На грчките земјоделци им требаат 50.000 работници за да го соберат овошјето и зеленчукот во мај. Овие работници инаку доаѓаа од соседните Албанија, Македонија, Романија и Бугарија.
Тирана планира значително да ги олесни своите рестриктивни мерки до средината на мај.
Грчките медиуми јавуваат дека Министерството за земјоделство е загрижено дека затворените граници ќе резултираат во недостиг на работна сила, опаѓање на приносите и огромни загуби за економијата.
Официјална Атина сака да го олесни прекуграничното движење, но исто така да преземе мерки на претпазливост, како што се тестирање и задолжителен карантин, од неколку дена пред да пристигнат работниците на полињата.
Заработувачката на сезонските работници во Грција е исто така клучна за албанската економија.
