На утрешната владина седница ќе се одлучува за евентуално продолжување на полицискиот час за време на Првомајските празници, рече министерот за здравство, Венко Филипче, додавајќи дека мислењето на Комисијата за заштита од заразни болести, со консензус, сметаат дека полицискиот час треба да биде продолжен, односно да трае од четврток навечер до понеделник наутро.
Во однос на ставот на министерот за внатрешни работи, Наќе Чулев, за престојниот празник да нема ограничување како за Велигден, Филипче посочи дека одуката ќе ја донесат стручните лица од Комисијата на заразни болести, врз база на епидемиолошки и медицински сознанија.
Филипче кажа дека на утрешната ќе се слушнат сите предлози и ќе се донесе крајната одлука.
Вчера инаку тој одговарајќи на новинарско прашање кажа дека Владата, зависно од однесувањето на граѓаните деновиве, ќе донесе одлука дали празникот 1 Мај ќе го поминеме во карантин.
– Видовме слики од овие изминати денови од граѓани кои навистина ги почитуваат мерките, но има и голем број граѓани кои не ги почитуваат овие мерки. Мерката на разлабавување на полицискиот час ја донесовме заедно со мерката за задолжително носење заштитина опрема. Ако овие мерки не се почитуваат ќе имаме несакан ефект.
Ќе го следиме однесувањето на граѓаните и ќе донесеме одлука какви мерки ќе преземеме за следниот викенд – соопшти министерот Филипче на вчерашната прес конференција.
