Се надевам дека ќе се дружиме само две години, беа првите зборови кои ги изговори Димитар Апасиев, претседателот на Левица, како пратеник денеска од собраниската говорница на седницата за избор на претседател на Собранието.
Министерот за надворешни работи го нарече „Николче Димитров“, по што Џафери како претседавач на седницата го опомена правилно да ги изговара имињата и презимињата на функционерите.
– Во левичарските кругови велат сум личел на Че Гевара, но единствен пат во историја од герила директно во Влада му се случило само на Талат Џафери, за што само може да му се честита, рече Апасиев, чија партија за прв пат стана парламентарна на последните избори на 15 јули.
Џафери на ова му возврати дека Апасиев во тој случај е пандан на Фидел Кастро.
Побара да се тргнат знамињата на ЕУ и НАТО од собраниската сала, за да не дојде време и да се стават „такви на САД“.
– Не прозборе ниту еден збор на македонски на конститутивната седница, а и потписот каде што го става во графата за кирилица, него му е на латиница, рече Апасиев за Џафери.
За собранискиот деловник рече дека е „швајцарско сирење“, а за Џафери рече дека своевремено правел филибастеринг со цитирање на Ацо Шопов, а потоа како претседател на Собранието не дозволувал други тоа да го прават.
