Ние полека стануваме мешавина на американскиот модел и на шведскиот модел. И тоа може да биде најголем проблем во наредниот период.
Во Америка каде има најмногу заразени и умрени од ковид-19 пандемијата покажа дека системот на јавно здравство не функционира, но затоа имаат врвни клиники кои можат да излечат пациент од ковид-19 за два дена, како во случајот со Претседателот Доналд Трамп.
Што ќе рече тој што има пари ќе има врвна здравствена услуга, а тој што нема пари ќе треба да има добар имунитет за да нема посериозни компликации.
Нешто слично сега се случува кај нас. Група од инфектолози и медицински сестри ги напуштаат државните клиники и се вработуваат во богатите приватни болници.
И тоа доаѓа во услови кога Македонија како да спроведува некоја варијанта на мек шведски модел. Да нема претерани рестрикции, а државното здравство сепак да може да се справи со наглиот скок на бројот на заразени.
Но мешавина на американски и шведски модел може да биде катастрофа за Македонија. Не може да се слабее државното на сметка на приватното здравство, и тоа во услови на галопирачка пандемија, а вие да спроведувате шведски модел. Тоа ќе доведе до колапс на јавното здравство.
Затоа денес Македонија се соочува со трансфери на доктори и медицински персонал кои седум месеци се справуваа со ковид-19.
Министерот за здравство Венко Филипче потврди дека група доктори изморени од борбата со Ковид-19 си одат или најавуваат заминување од државната клиника. Филипче рече дека на нивно место доаѓаат нивни колеги.
Три медицински сестри и инфектолог од Инфективната клиника во Скопје, дале отказ и ќе работат во приватна болница, изјави денес Венко Филипче. Според него отказ најавила и шефицата на ковид-центарот во болницата 8 септември, Патриција Каламарас. Филипче вели дека дел од нив заминуваат бидејќи се преморени, а дел имаат лични причини или подобри финансиски понуди.
Нога пуштија, главната медицинска сестра на Инфективната клиника и уште две медицински сестри од истата клиника. Тие ковертираа откази на крајот од септември, а министерот ги покани на состанок во неговиот кабинет со намера да ги убеди да останат.
И сето ова се случува во услови на пандемија која се јавува еднаш на сто години, докторите и сестрите за ковид-19 биле изморени и ќе заминеле во приватни болници: Што ќе прават таму-ќе одмараат или ќе работат!?
Државата инвестирала во нив и кога државата се соочува со пандемија тие место да лекуваат граѓани на Македонија кои немаат пари да се лекуваат во скапи приватни болници, ќе лекуваат богати Македонци и Косовари во Систина или во некоја друга приватна болница!?
Извор: ВоЦентар
