Наместо во истражниот затвор во Шутка, Зоран Милески Кичевскиот затворската казна ќе ја издржува во струшкиот затвор во нас. Теферич кој е од отворен тип. Според новиот упатен акт за издржување на затворската казна Милески треба да се пријави во затворот на 26 октомври.
Ова следува откако обвинетиот го повлекол барањето за одложување на затворската казна во кое според информациите од судот, како причина била наведена промената на неговата адреса на живеење од Скопје во Охрид, а со тоа и преминувањето на надлежноста за предметот од скопскиот во рацете на охридскиот суд. Упатниот акт во судот е издаден вчера. Од затворот во Струга за тв 24 велат дека до нив сеуште не стигнало ништо, и дека засега околу случајот имаат информации само од медиумите.
„До овој момент сеуште го немаме добиено дописот од судот, пресудата и упатниот акт.Она со што во овие моменти располагаме за овој случај се информациите од медиумите.Но во следните денови сигурно и ќе го добиеме дописот по редовна пошта како што е пракса досега.“ велат од затворот.
Затворот во Струга е од отворен тип каде лежат лица осудени на казна затвор од три до пет години.
Во случајот на Милески од одредените три му остануваат да одлежи помалку од две, бидејќи му се смета и времето кое го помина во притвор.Тој е осуден за делото примање награда за противзаконито влијание за кое уште на првото судско рочиште за „Рекет“ на 3 декември лани призна вина.
Поднесе жалба, но Апелацискиот суд во Скопје на 4 септември годинава ја потврди пресудата во делот на висината на казната од три години, а потоа Основниот кривичен суд пред дваесетина дена му испрати упатен акт со кој тој требаше да се јави во затворот во Шутка на 12 октомври.
Но, во меѓувреме, Милески ја променил адресата на живеење од Скопје во Охрид и од тие причини побарал одложување на казната.
