Министерството за здравство доби задолжение да ја спроведе постапката за набавка на 200 илјади дози од кинеските вакцини против ковид-19, согласно со член 55 став (1) точка г) од Законот за јавните набавки, односно преку постапка со преговарање без објавување оглас.
Оваа одлука е донесена на вечерашната владина седница на која е одлучено да се направи набавка на САРС-КоВ-2 инактивирана вакцина против ковид-19.
„Станува збор за нова набавка на дополнителни количини, покрај оние од КОВАКС-механизмот од 833 000 дози на вакцина за кои Министерството за здравство изврши уплата на авансот и ја обезбеди финансиската гаранција, со што ги исполни финансиските обврски што произлегуваа по основ на склучениот Договор“,
информираат од владината прес-служба.
Според најавите, првите количини од КОВАКС-механизмот се очекува да бидат испорачани во првата половина на февруари.
Како што информираат од Владата, во завршна фаза се и директните разговори со производителот „Фајзер“ за набавка на уште 800 000 единечни дози за сукцесивна испорака на договорените количини во наредните месеци, од кои, првите во февруари.
