Војната во Украина, Германија ја дочека со празни складишта за гас. Земјата мора да ја промени својата енергетска политика преку ноќ, особено ако Кремљ ги исклучи вентилите.
Германија го овласти својот центар за трговија со гас да купува течен природен гас за 1,5 милијарди евра (1,66 милијарди долари) надвор од Русија, иако Москва во моментов ги исполнува сите обврски од договорот за снабдување, објави вчера Министерството за економија.
„Сега е да се одлучи каде ќе се купува гасот. Не би сакал да пресметам за колку дена тоа ќе биде направено, но тоа ќе се случи за многу кратко време“, изјави портпаролот на Министерството на прес-конференција додавајќи дека најбрзо е купувањето арапски гас.
Најголемото складиште за гас во Западна Европа се наоѓа во германската покраина Долна Саксонија на длабочина од два километри. Се вика Реден и е голем колку 910 фудбалски игралишта. Може да обезбеди едногодишна потрошувачка на гас за околу два милиони домаќинства.
Реден игра клучна улога за Германија и Европа кога станува збор за безбедноста на снабдувањето со гас. Астора, компанијата која управува со складиштето, е подружница на рускиот енергетски гигант Гаспром, кој контролира повеќе од една третина од сите германски складишта за гас.
Сите тие во моментов се речиси празни. Во Реден се пополнети само три отсто од капацитетот. Германскиот министер за економија Роберт Хабек претпоставува дека магацините се „систематски испразнети“ со цел стратешки да се покачат цените и да се создаде притисок.
Околу 55% гасот во Германија доаѓа од Русија. Од Русија, исто така доаѓа 50 отсто од јагленот и повеќе од 30 отсто од потребите за нафта. Додека во Германија има стратешки резерви на нафта, кои според законот мора да бидат доволни за 90 дена, таква одредба не постои за гасот и јагленот. Овде компаниите сами одлучуваат за своите залихи.
Германското Министерство за економија сака тоа да го промени што е можно поскоро, особено за гасот. Намерата е со закон да се пропише минималното ниво во магацините. Така, на почетокот на октомври секој магацин би требало да се наполни најмалку 80 отсто, на почетокот на декември 90 отсто, а на крајот на зимата на почетокот на февруари најмалку 40 отсто. И така секоја година.
За повеќе детали,Тука
