Чудна смисла за хумор има Ковачевски, морам да признаам, но има само еден начин тоа да го докаже и покаже, порача лидерот на ВМРО-ДПМНЕ Христијан Мицкоски за изјавата на премиерот Димитар Ковачевски, во обраќањето на традиционалниот пикник по повод 11 Октомври во Куманово, дека СДСМ ќе ја формира идната влада..
Наместо како кукавица да биде под фустанот на ДУИ, нека излезе на избори па ќе видиме кој кого ќе победи, какви ќе бидат резултатите. Се додека како кукавица коленичи под фустаните на поголемиот партнер во Владата ДУИ, за жал ќе остане само на кукавичко заканување, а делата ќе изостанат. Има мали карактери кај кои што проработува филозофијата на нивната фрустрација и честопати тие знаат таа фрустрација и во јавност да ја артикулираат, но еве јас го повикувам еднаш да се охрабри, да не биде кукавица, да не се крие, нека излезе на избори да се соочиме со граѓаните и да видиме кој е тој, дали тој ќе победи или резултатот ќе биде поинаков. Ние сме подготвени уште утре да се распушти Собранието и да одиме на избори – порача Мицкоски.
Ковачевски изјави дека СДСМ ќе го даде победничкиот кандидат на претседателските избори наредната 2024 година и СДСМ ќе ја формира иднината европска Влада.
-Затоа што се работи за најважното, иднината на нашата убава татковина. Северна Македонија ќе биде европска држава. Блокадите ќе бидат поразени. Затоа што никој не сака неизвесност, изолација и економска стагнација – кажа Ковачевски.
Според него, граѓаните сакаат економски напредок, повисоки плати, подобар живот во европска држава.
