Македонија

СЦЕНАРИО ИЛИ ПРОПУСТ На приемот на амбасадата на САД, Тамара ги заборави Делчев, Груев, Гули и Сандански од македонската химна (ВИДЕО)

јули 4, 2019

За време на интерпретацијата на македонската химна Тамара Тодевска случајно или не заборави да го испее токму тој дел од строфата каде што се споменуваат Гоце Делчев, Даме Груев, Питу Гули и Јане Сандански. Обединетата македонска дијаспора повика на итно изјаснување и извинување од страна на амбасадата на САД во Скопје, Македонија.

По повод националниот празник на САД, 4 Јули, вчера во американската амбасадаво Скопје се одржа прием на кој присуствуваа голем број гости, меѓу кои беа и претседателот Стево Пендаровски, премиерот Зоран Заев, претставници на Владата, лидерот на опозицијата Христијан Мицкоски, претставници на дипломатскиот кор, бизнисмени…

Пред почетокот на официјалниот дел од програмата на приемот македонската химна ја изведе Тамара Тодевска. Случајно или не, за време на интерпретацијата на Тодевска беше заборавен токму делот од втората строфа од химната во кој се споменуваат Гоце Делчев, Даме Груев, Питу Гули и Јане Сандански. Први на ова реагираа здруженијата на Македонците од Бугарија и потсетија на актуелните разговори меѓу експертите на двете земји за тоа чиј е Гоце Делчев. И на социјалните мрежи има голем број на реакции на овој потег на Тамара Тодевска.

Обединетата македонска дијаспора повика на итно изјаснување и извинување од страна на aмбасадата на САД во Скопје, Македонија, за неприфатливата грешна македонската национална химна испеана од Тамара Тодевска за време на приемoт по повод Ден на независноста 4 Јули.

ОМД цврсто верува дека ова не е грешка, туку намерно, поради некои повици за промена на химната на Македонија (Тиранската платформа) бидејќи Бугарија инсистира на тоа овие историски личности да бидат етикетирани како бугарски во учебниците за историја на Македонија. Бугарија се закани дека ќе го блокира патот на Македонија кон ЕУ ако овие барања не бидат исполнети.