Во текот на летниот период расте бројот на питачи по улиците.
Питачењето е сериозен проблем во туристички Охрид и Струга. Најчесто на улица се сретнуваат деца од ромска националност на возраст од 7 до 14 години. Голи, боси и изгладнети просат пари од минувачите. Повеќето од нив дојдени се од Баиро и од Штип.
Од граѓанските здруженија велат дека станува збор за организирано питачење. Во текот на летниот период се носат сиромашни деца од други градови, кои се оставени на милоста на граѓаните. Полицијата и ова лето реализира повеќе акции за отстранување на питачите од улица во двата градови.
– „Тоа секако дека претставува една грда слика за туристичките центри Охрид и Струга. Во оваа насока СВР Охрид има акциски контроли не само во централното градско подрачје туку и во останатите делови периферните делови на Охрид и Струга, а целта е да се превенира оваа појава. Ние согласно законот за прекршоци против јавниот ред и мир преземаме мерки. Полициските службеници преземаат мерки по лично согледување но и по дојава од граѓани“, вели Стефан Димоски портпарол на СВР Охрид.
Најчесто лицата што просат на брегот на Охридското езеро се од други градови: Битола, Скопје,а ги има многу и од Источна Македонија. Оние кои се затекнати на лице место се предаваат на Центарот за социјални работи од каде се упатуваат до нивните места на живеење.
-„Најголем дел од лицата кои питачат во Охрид и Струга се малолетници секако дека има и возрасни со нив но она што го преземаме е исто така и против возрасните кон кои се поднесуваат пријави согласно челенот 24 од Законот за прекршоци против јавниот ред и мир.Најголемиот дел од воие лица доаѓаат од други подрачја од Битола, Прилеп и повеќе градови од Источна Македонија и од тука сакам да напоменам дека активно сме вклучени во елиминирањето на оваа појава. Имено питачењето е грда слика за туристичките центри и претставува проблем и за жителите на Струга и Охрид и за туристите “, додава Димоски.
Исто како и лани од јануари до јули годинава на подрачјетто на Охрид и Струга регистрирани и се 15 случаи на питачење против кои се преземени законски мерки. Законот за прекршоци предвидел и казни од 15 до 30 евра во денарска противредност.
Новинар Соња Рилковска
охрид нет
