ЦИА ја тргнала својата ознака за тајност од досието кое открива како гулабите биле користени во тајни шпионски мисии во текот на Студената војна.
Во документите опишано е дека гулабите биле истренирани да “фотографираат“ сомнителни локации во Советскиот Сојуз, но и тоа како гавраните биле користени да испуштаат уреди за прислушкување на праговите од прозорците, а делфините биле користени за подводни мисии.
Операцијата од 70-те години на минатиот век со име “Такана“ ја истражувала употребата на гулабите со минијатурни камери кои автоматски снимаат и фотографираат, се наведува во објавените досиеја.
ЦИА го искористила фактот што гулабот има неверојатна способност, речиси супермоќ, да може да биде оставен некаде каде што никогаш не бил и да го пронајде патот до дома, пренесуваат од Би-би-си.
Во рамките на операцијата “Такана“ истражено е користењето на другите животни за потребите на разузнавачките служби, па така ЦИА ги тренирала гавраните да испуштаат и повторно да ги земаат малите уреди со тежина од 40 грама на прагот од прозорците на непристапни згради.
ЦИА исто така истражувала дали птиците преселници можат да се искористат така што ќе им се постават сензори со кои може да се утврди дали во Советскиот Сојуз се тестира некое хемиско оружје.
Очигледно дека имало и некои тестирања со некој вид на електрична стимулација на мозокот за кучињата да бидат управувани, но многу детали околу тоа се оставени во тајност.
ЦИА во текот на 1960-та година се обидувала да ги користи и делфивните за да се пробијат во пристаништата. Проблемот настанал тогаш кога агентот не можел да преземе целосна контрола на делфинт поради тренерот кој што работел со него.
На крајот се заклучило дека гулабите се најефикасни и во текот на 1970-те ЦИА почнала да спроведува серија тајни мисии. Користена била камера вредна околу 2.000 долари, тешка само 35 грама, а фотографиите кои биле направени биле со неверојатен квалитет.
На фотографиите јасно се забележувале детали на луѓето кои се возат со автомобил со поголем квалитет и од оние кои во тоа време се правеле со сателити.
Во текот на Втората светска војна, малку позната британска разузнавачка служба, MI- 14, исто така спуштала гулаби во контејнерите со падобрани во окупираните европски земји. Повеќе од 1.000 гулаби се вратиле со пораки, вклучувајќи детали за локации, за лансирање ракета V1 и германски радарски станици.
