Повратот на 15 проценти од платениот ДДВ, заклучно со 19 септември, изнесува
2.666.000 евра, соопшти директорката на Управата за јавни приходи, Сања
Лукаревска. Тоа значи дека за неполни три месеци откако беше воведена на 1 јули, секој граѓанин
на Македонија добил во просек по нешто над 1 евро.
Лукаревска денеска на прес-конференција оцени дека мерката „Мој ДДВ“ ги дава
резултатите за целите за кои е воведена – и влијае на намалување на сивата
економија и враќа пари кон граѓаните.
Според директорката, заклучно со 19 септември скенирани се 19,905,878 фискални
сметки, остварен е промет од 10,073,372,640 денари, а вкупниот ДДВ изнесува
1,093,180,972 денари. Од овие, повратот на 15 проценти од платениот ДДВ изнесува 163,977,146 денари или
2.666.000 евра.
Лукаревска исто така оцени дека „само во првите месеци од воведувањето на МОјДДВ,
јули и август, наплатата на ДДВ е зголемена за 10 проценти во однос на минатата
година“, пренесе Макфакс.
