Власта во 5 минути до 12 часот го менува Законот за да им ги зголеми платите на вработените во јавниот сектор за 5 насто, како што вети лани. Државните институции чекаа денеска да поминат измените во Собранието за да ги исплатат септемвриските плати.
Повисоките плати на вработените во јавната администрација повлекуваат дополнителни 10.2 милиони евра од буџетот до крајот на годината. За целата оваа 2019 година за плати на администрацијата ќе бидат потрошени 460 милиони евра, што е за 25 милиони повеќе од лани. Сумата е зголемена поради повисоките плати, но и поради новите вработувања во јавниот сектор, кој од година в година е се поголем. Но критиките и незадоволството од услугите што администрацијата им ги дава на граѓаните и на компаниите не се намалува.
