Холивудската актерка Сара Џесика-Паркер го гледаше прикажувањето на македонскиот документарен филм „Медена земја“ по што го сподели своето воодушевување на својот профил на Инстаграм.
Глумицата од неколку култни филмови објави фотографија од филмот и напиша дека е сигурна дека „Медена земја“ ќе влезе во трката за Оскар во својата категорија.
„’Медена земја’ е неверојатна, визуелно зачудувачка, интимна, а, сепак, епска приказна за пчеларката Атиџе Муратова. Жена која нема никогаш да ја заборавам. Има причина зошто овој филм ја добива секоја награда за документарен филм“, пишува Џесика-Паркер.
Таа во постот им честита на филмаџиите Љубомир Стефанов и на Тамара Котевска. „Ви благодарам што ни дозволивте да патуваме со вас во малото село во Република Македонија, ќе ве следам насекаде“, пишува таа.
Таа уште додава дека филмот се прикажува во Њујорк и го погледнала во Quad Cinema.
„Медена земја“ вечерва е на „Киненова“, а се прикажува и во Куманово, Битола, Свети Николе.
