После неколкунеделни подготовки, минатата седмица, оркестарот на „Танец“ составен од десет врвни инструменталисти под музичко водство на Дарко Илиевски, а придружуван од уметничкиот раководител на инситуцијата Бранка Костиќ-Марковиќ, се закити со престижната награда, Гранд При на Меѓународниот фестивал на уметностите “Les Etoiles De Paris”. Во конкуренција на 350 учесници, со врвен настап, оркестрантите на “Танец” го освоија четиричленото меѓународно жири и публиката, и беа апсолутни победници и миленици на целиот фестивал. Нивното музицирање, и во официјалниот дел и на гала концертот беше проследено со овации.
После успешниот настап, уметниците на „Танец“ беа во посета на македонската амбасада во Париз, на покана на амбасадорката Јадранка Чаушевска Димов.
После остварувањето на главната мисија за успешно претставување во француската престолнина, музичарите уживаа во прошетката низ познатите париски улици и во посетата на најважните културни знаменитости.
Она што е најважно, „Танец“ уште еднаш потврди дека е вистински репрезент на македонската култура во светот. Ова семејство од колеги може да се гордее со своите професионални и лични заложби и да биде пример за сите генерации уметници.
Оркестарот на Танец освои Гранд При во Париз во конкуренција од 350 учесници
