Докторите специјалисти, медицинските сестри, лаборантите, општите лекари и здравствените работници од јануари ќе земаат повисоки плати. Но не и таканаречениот административно – технички персонал. За нив нема да има покачување на платите. Министерот за здравство, Венко Филипче, рече дека засега за нив не се планира покачување на платите.
Независниот синдикат на административно техничкиот персонал бараат покачување на платите, каде се опфатени хигиеничарите, чуварите и возачите на брзата помош, инаку во спротивното најавија протест на 28 ноември.
„Платите на административно техничкиот персонал се под минималната плата во државата и изнесуваат од 12.000 до 20.000 денари. Персоналот е изманипулиран, заборавен и оставен да функционира и преживува со минимални просечни примања од кои не може да ги покрие основните потреби за пристоен живот. Медицинскиот персонал не може да функционира без нас. Возилото на итната медицинска помош не може да го управува доктор или сестра и да дава помош на пациентот, сите ние сме тим.“, велат од НСАТП.
Најголем дел од зголемувањето на буџетот во здравството, за 2020 година, ќе оди за покачување на платите. Над 30 милиони евра ќе се потрошат за платите на сите вработени во здравствениот сектор и за дежурства.
