Штипјанец дома чувал оружје доволно да се опреми една војничка чета. При полициски претрес , кај него се пронајдени три пушки, исто толку пиштоли, поголема количина муниција, како и дополнителна опрема за оружје:
„ Во куќата на М.Б. 44-годишен од Штип пронајдени се автоматска пушка „хеклер“ калибар 9×19мм, малокалибарска пушка, пушка-карабин „симун“, пиштол „бровинг“ калибар 9 мм, револвер „гранд“ калибар 22 мм, револвер „таурус“, 1.119 парчиња куршуми различен калибар, како и разновидна дополнителна опрема за оружјето (оптички нишан, пригушувач и друго)“, информираат од СВР – Штип.
Штипјанецот е приведен во полиција, а пронајденото оружје и муниција се одземени.
Во моментот, полицијата се уште истражува од каде и за која намена штипјанецот набавил и чувал толку многу оружје. Во интерес на истрагата, повеќе детали не се сооштуваат.
Од полицијата информираат дека по завршување и документирање на случајот, против осомниениот ќе биде поднесена кривична пријава.
М.Б. се сомничи за кривично дело „недозволено изработување, држење и тргување со оружје или распрскувачки материи“, казниво по чл.396 од КЗ .
