Техничкиот премиер Оливер Спасовски објави дека Македонија ќе одобри помош за Австралија во справувањето со големата огнена стихија која ја зафати земјата и однесе голем број човечки жртви и направи огромна материјална штета со тешки последици по биодиверзитетот.
Владата на првата следна седница, како што кажа Спасовски, ќе определи средства за поддршка за справување со последиците и реновирање на домовите.
„Секогаш сме ја имале поддршката од пријателска Австралија, а сега најмалку што може да направиме е да бидеме солидарни и да им дадеме мала помош за да ги надминат огромните штети кои ги направија пожарите“, напиша тој на својот Фејсбук.
Техничкиот премиер изрази сочувство на семејствата на загинатите и посака брзо справување со последиците за сите граѓани на Австралија и на сите припадници на македонската дијаспора.
„Нашата амбасада во Канбера и конзулатот во Мелбурн стојат на располагање за помош и поддршка на сите македонски граѓани, како и на целата наша дијаспора. Голема поддршка за пожарникарите, медицинските и други службени лица кои се борат со огнената стихија, како и до сите други институции и до владата“, додаде Спасовски.
