Нема трага од 28-годишната Марија Брзакова од Босилово, која исчезна во саботата во утринските часови. Полициски службеници ја барат низ Струмичкиот регион, вклучени се и кучиња – трагачи на МВР.
Од утре во потрага по Марија Брзакова ќе се вклучат и ловџиите од струмичко. Портпаролката на СВР Струмица, Хризантема Рендевска вели дека потрагата се организира во соработка со МВР и апелира сите заинтересирани ловџии да дојдат утре во 08:00 часот пред зградата на Општина Босилово од каде ќе започне акцијата за пребарување на теренот.
Марија во саботата била облечена во тренерки во темна боја, на нозете имала патики или влечки, со себе не носела ташна, мобилен или било каков документ. Висока е околу 160 сантиметри, средна градба, со долга костенлива коса. Исчезнување во полицијата го пријавил нејзиниот сопруг.
