Временскиот период на договорот според кој градежниот изведувач „Гранит“ треба да ги изгради првите два километри од автопатската делница од Скопје – Блаце е постигнат на 42 месеци, пишува во објавените услови кои се заемно договорени со инвеститорот.
Вредноста на склучениот договор со вклучен ДДВ е 881.742.867 денари или околу 14,3 милиони евра. Делницата од граничниот премин „Блаце“ до селото Блаце е дел од коридорот 10 кој треба да се комплетира до Скопје.
Од Скопје за Приштина ќе се стигнува за помалку од еден час, но кога ќе биде пуштен во употреба целосниот автопат од 12,5 километри засега нема прецизни рокови. Единствено се знае дека првите 2 километри ќе почнат да се градат на пролет, а проектот за останатите 10 километри допрва ќе се прави.
„Знам дека може да ви звучи дека е малку 2 километра за толку напор, меѓутоа автопат на таков географски терен во отсуство на било каков претходно подготвителен проект значеше многу ангажман на многу институции“, рече вицепремиерот Бујар Османи како координатор на проектот на потпишувањето на договорот.
Според договорот, „Гранит“ ќе гради како што ќе се ослободува теренот со експропријацијата, а јавното претпријатие Државни патишта ќе му плаќа авансно на периоди за да ја мобилизира оперативата. Доколку вонредните трошоци се поголеми од 15 отсто од предвидената сума, надзорникот ќе одредува колку треба да му се доплати на операторот.
Инаку за автопатот Скопје – Блаце долг 12,5 километри обезбедени се 120 милиони евра, 70 се кредит, 27 грант, а остатокот државни пари.
