Добро познат факт е дека Јосип Броз Тито бил голем љубител на холивудските филмови, па затоа не е чудно тоа што го искористил престојот на Кирк Даглас во СФРЈ за да се сретне со познатиот актер.
Холивудската легенда Кирк Даглас, кој почина вчера на 103-годишна возраст, своевремено во своите мемоари ја опишал средбата со Јосип Броз Тито. Како голем обожавател на седмата уметност, Тито испратил приватен авион за актерот и неговата сопруга.
“Бев во Југославија и сакав да се сретнам со претседателот Тито. Британскиот амбасадор ми рече: ‘Драг мој, јас веќе шест недели чекам претседателот Тито да ме прими на десет минути за да му дадам акредитиви. Немаш шанси’”, се присетил Даглас.
Според неговите зборови, кога излегол од канцеларијата на амбасадорот, тој го повикал претседателскиот кабинет. Следното утро Тито испратил приватен авион кој ги пренел Кирк и неговата сопруга до Љубљана, каде цели три часа разговарале и шетале.
Ми рече дека ги гледал сите мои филмови, а омилен му беше “Gunfight at the O.K. Corral”. Ми рече и дека обожува да гледа филмови бидејќи барем накратко му го одвлекуваат вниманието од проблемите со кои се соочува”, рекол Кирк во интервју со Роџер Еберт.
Холивудскиот актер се сеќавал и на средбата со британскиот амбасадор потоа, кој бил бесен поради фактот што Кирк веднаш успеал да договори средба со Тито, а тој шест недели не успевал во тоа.
“Вие поминавте три часа со Тито, а јас не можам ни десет минути. Кажете ми, ве молам, како ви успеа?”, го прашал амбасадорот, а Даглас едноставно му одговорил:
“Господине амбасадору, колку филмови имате снимено вие?”.
Извор Точка
