Речиси до 04 часот изутрината траеше седницата на Собранието на која пратениците со 62 гласа “за” и 26 “против” изгласаа разрешување на техничката министерката за труд и социјална политика Рашела Мизрахи.
Таа на 3 јануари годинава стана дел од техничката влада која треба да организира и да спроведе избори.
Премиерот Спасовски побара нејзина смена бидејќи таа не го почитувала Уставот, односно не ја сменила таблата со натпис Република Македонија во министерството.
Уште не влезена во Министерството како прва Еврејка во историјата на Македонија назначена за министер во Влада бев мета на антисемитски напади од лица кои ниту бираат средства, ниту начин, ниту зборови. Па наместо да ја критикуваат мојата работа, ја критикуваа мојата верска и национална припадност и ме обележаа со жолта ѕвезда.
Никогаш не сум прекршила ни Устав, ни закон. Баба ми Ризова Трајанка била член на партизанската бригада ‘Добри Даскаловски’ која крварела за слободата на Република Македонија. Јас сум Рашела Мизрахи, горда Еврејка од Македонија!” истакна Мизрахи од собраноската говорница по што следуваше пет часовна дебата.
