Денеска сме тука во гарнизонот, во касарната во Тетово, каде што втората екипа која заминува за Дебар е веќе подготвена, изјави министерката за одбрана, Радмила Шекеринска.
„Денеска е веќе направена една прва контрола и извидување од воздух на линијата каде што ќе бидат ангажирани армиските сили и веќе е почнат транспортот на еден дел од нашите сили. Стоиме на располагање и како и досега да покажеме дека Армијата е институција во која граѓаните со право имаат доверба и на која можат да сметаат“, рече министерката.
Шекеринска потенцираше дека брзата реакција на Владата во преземањето на мерки против ширењето на корона вирусот се покажа оправдана.
Се заблагодари на здравствените власти и здравствените работници за огромниот труд што го вложуваат во справувањето со вирусот, и упати апел до граѓаните да ги почитуваат препораките.
„Заедно можеме да го победиме корона вирусот, меѓутоа само ако ги почитуваме препораките, ако ги почитуваме забраните и ако направиме сè да се заштитеме и себе си и своите најблиски, а со тоа и целата држава“, рече Шекеринска.
Таа појасни дека главниот фокус на ангажманот на Армијата во овој момент ќе биде контролата на граничната линија.
Kризна состојба е прогласена за Дебар и Центар Жупа, за следните 30 дена со цел да се спречи ширењето на Ковид 19.
