Непознат дарител пратил 150 литри антибактериски гел за охридската полиција.

Дарител кој сакал да остане анонимен донесол 150 литри антибактериски гел во седиштето на Интернационалната полициска асоцијација (ИПА) во Охрид, кои ќе бидат распоредени во полициските станици во Охрид, Струга, Кичево и Дебар.

„ИПА-Регион Охрид доби донација од 302 парчиња или над 150 литри антибактерски гел и други дезинфекциски средства за одржување на лична хигиена. Донацијата ќе биде дистрибуирана до полициските службеници во Охрид, Струга, Кичево и Дебар, кои деноноќно се на терен и несебично се ангажирани во спроведувањето на безбедносните мерки за заштита на граѓаните од ширењето на коронавирусот”, вели претседателот на ИПА за регионот на Охрид, Стефан Димоски.

Пред неколку дена, Елица Нацева од охридското село Подмоље на полицајците им обезбеди 100 заштитни маски и 200 ракавици.