Министерството за здравство ќе достави предлог за олабавување на мерките во неколку фази до Комисијата за заразни болести, откри министерот Венко Филипче на денешната прес-конференција.
МЗ предлага оваа недела да се отворат центрите за едукација и обука, семинари на возрасни, организација на седници, авто-школи, испитни центри, спортски тренинзи за индивиуални спортови, спортски и други обложувалници преку шалтер без угостителска дејност, отворање на затворените трговски центри (молови) без угостителска дејност, како и отворање на центрите за рехабилитација на слух говор и глас.
– Следната недела ќе предложиме и отворање на угостителските објекти со послужување, зелено светло за спортските тренинзи на отворено за колективните спортови, а неделата после тоа и отворање на казината, теретаните и хотелските обекти – откри Филипче.
Министерот за здравство нагласи дека за олабавување на мерките се земени три клучни критериуми кои во предвид ги зема и Светската здравствена организација: дали епидемијата е ставена под контрола, дали здравствениот систем може да се справи со голем број случаи по олеснувањето на мерките и дали имаме капацтет за надзор, односно откривање на нови случаи.
Од утре почнува и скринингот со вработените во градинките, а за полицискиот час дополнително ќе се одлучува, информира Филипче.
Сподели
