Тимови составени од тројца здравствени работници и двајца претставници од општински избирачки одбор ги посетуваат живеалиштата на лицата со Ковид-19 и оние во изолација кои се пријавиле да го остварат своето гласачко право.
Со заштитни мантили, маски, ракавици и визири како и средства за дезинфекција се опремени сите тимови кои мора да ги менуваат при секое гласање.
Според информациите од ДИК, од пријавени 9.499 болни, немоќни и хронично болни лица во ОИК прифатени се барањата на 8.852 лица кои согласно упатството на Комисијата поднеле соодветна медицинска документација за да докажат дека имаат потреба од гласање во сопствениот дом. Гласањето утре ќе го спроведат избирачките одбори.
За споредба, на минатите избори пријавени за гласање биле само 3.540 болни и немоќни лица.
На 15 јули в среда ќе се гласа на 3.480 избирачки места во шесте изборни единици во земјата. Во 90 гласачки места има помалку од 10 гласачи кои според Законот ќе можат своето право на глас да го остварат во најблиското гласачко место. Граѓаните ќе може да се изјаснат за 1.578 кандидати на 15 партии и коалиции. Право на глас имаат 1.814.263 лица.
Сања Димитровска-Сител
