Поранешниот претседател на ВМРО ДПМНЕ, Љубчо Георгиевски најави дека ќе поднесе тужба до партијата за новите статутарни измени, со кои меѓу другото се укинува титулата почесен претседател, која тој досега ја имаше.
Георгиевски, кој е претседател на ВМРО – Народна партија смета дека согласно позитивната правна регулатива веќе стекнато право како почесен претседател на партијата не може да биде одземено.
И затоа ангажирал правен тим кој на суд ќе треба да го докаже тоа.
Освен на Георгиевски, титулата почесен претседател на ВМРО ДПМНЕ, според новите измени, му се укинува и на Никола Груевски.
Во меѓувреме, не стивнуваат реакциите од поранешни и актуелни членови на ВМРО ДПМНЕ кои бараат оставка од Мицкоски.
Денека кон нив се приклучи и поранешниот градоначалник на Аеродром, Ивица Конески, кој на ФБ напиша дека резултатот од парламентарните избори покажа дека е крајно време за промени во ВМРО-ДПМНЕ.
Повеќе од јасно е дека на партијата и е неопходен добар тим, раководство со капацитет за обединување и демократизација, кои во моментов се клучни за враќање на довербата кај граѓаните, напиша Коневски.
Од ВМРО ДПМНЕ му одговорија дека Коневски тежи минус 4 илјади гласа, добро е што не работеше на оваа кампања, па ВМРО-ДПМНЕ повторно си го врати Аеродром.
Добро е што Ивица Коневски излезе со став, инаку сликата на печалбар од ВМРО-ДПМНЕ не би била потполна, велат од партијата.
Откако, Централниот комитет одлучи Мицкоски да не си дава оставка, туку да продолжи со обидите да формира парламентарно мнозинство, на површина излегоа притаените тензии.
Најгласни беа поранешните функционери и исклучените од партијата. Митко Јанчев, Никола Попоски, Даниела Рангелова и Сашо Мијалков на социјалните мрежи бараат оставка од Мицкоски и сериозни реформи во партијата.
Далиборка Демјанска Цветановска-Телма
