Грчкиот суд денес ги осуди лидерите на екстремно десничарската организација „Златна зора“ на по 13 години затвор, што е максималната казна за водење на злосторничка организација обвинета за бројни кривични дела поттикнати од омраза.
Претседателката на судот, Марија Лепениоти ја прочита казната за лидерот на организацијата, Никос Михалољакос и уште седмина поранешни пратеници во грчкиот парламент, пренесува новинската агенција „АП“.
Останатите членови на организацијата се осудени на казни од пет до седум години за членство во организацијата, додека еден соработник на „Златна зора“ е осуден на доживотна затворска казна поради убиството на грчкиот рапер Павлос Фисас во 2013-та година.
Организацијата „Златна зора“ е основана во 80-тите години од минатиот век како неонацистичка група, а стана трета по сила политичка партија после големата економска криза која ја погоди соседна Грција во текот на минатата деценија.
точка
