Организаторите на протестот за случајот „Монструм“ побараа обвинителката Фатиме Фетаи да биде разрешена, а судењето да се врати на почеток. Качен на авотомобил пред толпата Бедри Ајдари, роднина на еден од обвинетите во „Монструм“ рече дека тие не се терористи и не се сторители на делото и побара да бидат ослободени.
Ние сме граѓани тука, од Македонија, не сме имале никогаш проблеми, ниту со соседите. Ние, нашите семејства не сме едуцирани да убиваме, а најмалку да направиме терористички чин. Ние го осудуваме овој чин, но не сакаме да не најдат како случајна жртва за да понесеме одговорност. Жалиме за убиените, сочувствуваме со семејствата, но треба да се откријат вистинските злосторници, рече тој, додавајќи дека обвинителката не предложила нови докази.
Она што го бараат, порача, е да се спроведуваат законите.
Знаеме дека правниот систем од поодамна е корумпиран, се озборува и во Европа и сегде, имаме примедби од Прибе и од други кои укажуваат дека не ни чини правниот систем. Овие луѓе кои дојдоа, не дојдоа затоа што сум познато име јас, туку веруваат дека треба правда за политички монтирани случаи, рече Ајдари.
Спомнувањето на името на Фетаи беше пречекано со многу извици во кои имаше и навредливи етикети на сметка на обвинителката. Ајдари рече и дека ќе бидат известени амбасадите на САД и ЕУ и побара меѓународен мониторинг на судскиот процес и негово враќање на ново разгледување и судење.
