Педесет и четиригодишна медицинска сестра од Универзитетската клиника за ортопедија при ЈЗУ ТОАРИЛ побарала пари и поклон од син на пациентка која требало да се оперира.
Како што информира Основното јавно обвинителство Скопје, за неа е поднесен обвинителен предлог за кривично дело примање награда за противзаконито влијание од член 359 став 1 од Кривичниот законик. Обвинителот до Основниот кривичен суд Скопје доставил и предлог за определување мерки на претпазливост за обвинетата, односно забрана за напуштање на домот и за преземање определени работни активности кои се поврзани со кривичното дело.
Пријавената во периодот од 23 до 28 септември 2020 година, од син на пациентка која требало да се оперира, побарала 300 евра, бонбониера и пијалак, наводно како награда за докторите што ја извршиле операцијата.
„Наградата ја побарала со порака испратена до член на семејството на пациентката. Откако ѝ биле дадени 300 евра, таа 150 евра задржала за себе, а кесата со останатите 150 евра, бонбониерата и пијалакот им ја предала на двајцата доктори, без да им каже зошто им ги дава. Кога докторите виделе што има во кесата, настанот го пријавиле во полиција“,
се наведува во соопштението
