Политичката партија Левица денеска соопшти дека нивните двајца пратеници, Димитар Апасиев и Борислав Крмов поднеле кривична пријава против претседателот на Собранието – Талат Џафери, како и двајцата пратеници, Бисера Костадинова-Стојчевска и Мирослав Богдановски од Скопје.
Како што појаснија од партијата Левица, пријавата против Џафери, Костадинова-Стојчевска и Богдановски била поднесена до Државниот санитарен и здравствен инспекторат поради прекршување на мерката строга изолација, како и кривична пријава до Основното јавно обвинителство.
„Тројцата се теретат дека, со умисла и по претходна меѓусебна координација, сториле кривично дело „Непостапување според здравствените прописи за време на епидемија“ (казниво по чл. 206 од Кривичниот законик), како и обид за „Пренесување на заразна болест“ (чл. 205 од КЗ) врз останатите пратеници, со елементи на тешки дела против здравјето на луѓето.
Дополнително, со таквото свое дејствие, предизвикале став и несигурност кај пратениците и кај јавноста, но воедно го довеле во прашање животот и здравјето на народните избраници и на нивните семејства, а со тоа и нормалното функционирање на институцијата Собрание на РМ – како централен државен орган и единствен уставен носител на законодавната власт во Републиката. Сето ова го договарал и знаел и собранискиот спикер – третопријавениот Џафери, но истиот не само што не сторил ништо за да го спречи, како најповикано одговорно службено лице со дадени овластувања со Законот за Собранието на РМ и со Деловникот на Собранието на РМ, туку истиот и го организирал овој опасен биохазарден експеримент, кој може да го парализира нормалното работење на законодавниот дом во целина!
Очекуваме од ОЈО Скопје да постапи во поднесената пријава во најбрз можен рок, како и во другите случаи на прекршување на мерката домашен карантин на лица позитивни на коронавирусот, со што би ставил до знаење дека сите граѓани се еднакви пред Уставот и законите“, стои во соопштението на Левица.
