Од почетокот на наредниот месец, односно 1-ви јули, ќе почне издавањето на патни исправи со името Република Северна Македонија, потврдиле од МВР.
“Што се до однесува за прашањето за рокот на важење на личните документи (лични карти, пасоши и возачки дозволи) со старото име, истите ќе важат согласно законската регулатива и тоа пасошите и возачките дозволи ќе треба да се заменат најкасно до 12.02.2024 година, додека за важноста на личните карти ќе бидете накнадно известени затоа што Законот за лична карта се уште е во собраниска процедура”, велат од МВР за Фокус.
Според некои неофицијални наводи, надградбата на системот за лични документи која се правеше пред неколку недели, била токму поради имплементирање на новото име.
Министерот за внатрешни работи, Оливер Спасовски вели дека нема застој во издавањето на лични документи, туку е зголемен обенот на побарувачка поради ковид-кризата.
“Лични документи се издаваат и сега, едноставно имаше зголемен обем на побарувачка поради ковид-кризата, многу од луѓето не виделе дека им истекува рокот на важноста на личните докуемнти. Имаме најава дека од денеска од 21 часот ќе имаме миграција на податоци во новиот систем за издавање документи, тоа е процедура којашто мораме да ја завршиме, бидејќи на тоа не обврзуваат и законите и Уставот и веќе од понеделник повторно започнуваме со нормално функционирање. Застојот ќе биде во четврток, петок и викендов”, вели Спасовски, пренесува “360 степени”.
