Судијата за извршување на санкции од Основниот кривичен суд во Скопје дури денес поладне добил известување од Основниот суд во Куманово дека за Ајвази Ајдиљраман (37) алијас командант Тануша има пресуда со која судскиот процес во кој тој е осуден на затворска казна од 20 години за убиство, е вратен на повторно судење. По ова известување, судијата за извршување на санкции од Скопје ги известил МВР од каде пред само 4 дена во успешна акција командант Тануша беше фатен по распишана меѓународна потерница, а известен е и затворот во Идризово. За МКД.мк од затворот во Издризово потврдија дека попладнево командант Тануша излезе да се брани од слобода.
Тануша од бегалец баран по потерница и осуденик за убиство, е пуштен на слобода.
Пресудата за бегалецот по кого се трагаше за убиство ја донел Основниот суд во Куманово, а потоа е потврдена и од Апелацискиот суд. Со оваа пресуда командант Тануша добил казна затвор во траење од 20 години за убиство.
Согласно Законот за извршување на санкции, бидејќи Ајдиљраман по место живеење се води во Скопје, надлежен за распишување на меѓународна потерница за него е судот во Скопје, од каде ни потврдија дека дури денес добиле известување за укината пресуда.
„Денес попладне Основниот суд во Скопје од каде е распишана потерница за осудениот, доби известување од Основниот суд во Куманово кој е надлежен за донесената првостепена пресуда, дека пресудата на кумановскиот суд е укината од Врховниот суд и предметот е вратен на повторно судење во Основниот суд Куманово. По добиената пресуда , судијата за извршување на санкции ги извести МВР и затвор во Идризово”, ни одговорија од Основниот кривичен суд во Скопје.
Пред само неколку дена МВР спроведе акција и го уапси командант Тануша во болница во Скопје. По ова, министерот за внатрешни работи Оливер Спасовски ја пофали екипата која ја спроведе акцијата за апсењето на бегалецот.
Но, Основниот суд во Куманово се до денес не испратил известување дека за командант Тануша наместо потерница, сега има укината пресуда од Врховниот суд.
Од МВР велат дека постапуваат по наредба на Судовите, во овој случај на Судот во Скопје кој е единствен кој што може да ја отповика меѓународната потерница. Но, ниту Судот немал известување дека била укината пресудата, па така меѓународната потерница остана активна и командант Тануша беше фатен.
По добиените известувања од судијата за извршување на санкции, затворот во Идризово го пушти да се брани од слобода бидејќи за него постапката се враќа на повторено судење.
Командант Тануша се бараше со меѓународна потерница за извршено кривично дело по член 123.
MKD.MK
