Во интерес на објективното информирање на јавноста, изјавуваме дека д-р Мирослав Гроздановски од 30.7.2021 година не е вработен во Службата за неврологија при ЈЗУ Здравствен Дом – Скопје поради тоа што докторот по своја волја, односно самоиницијативно од 26.7.2021 година до 28.7.2021 година, три дена не се појавил на работното место специјалист невролог, стои во реакцијата на ЈЗУ Здравствен Дом – Скопје на денешната објава на „Слободен печат“ со наслов „Оти укажа на грешка: Д-р Гроздановски доби отказ на три години до пензија“.
Информираме дека д-р Гроздановски беше вработен во ЈЗУ Здравствен дом – Скопје како специјалист по неврологија и неговото прераспоредување во друга поликлиника не е воопшто поврзано со фотографираната погрешна табла(како што тој наведува), туку заради потреба од специјалистички услуги од овој тип во Поликлиника Бит-пазар во која неколку месеци нема специјалист невролог, а на истото подрачје здравствената услуга од овој тип е неопходна.
Во ЈЗУ Здравствен Дом – Скопје, согласно Статутот и организацијата на Домот, лекарите се распределeни по Служби, а не по поликлиники, и за потребите на Домот се распределуваат во поликлиники каде е потребно, сѐ со цел сите здравствени услуги да се достапни на граѓаните на сите подрачја на територија на град Скопје и околните места, реагираат од ЈЗУ Здравствен Дом – Скопје.
– По добиеното известување на 29.7.2021 г. од Раководителот на Службата за неговото неоправдано отсуство, институцијата мораше да постапи согласно законските обврски.
слободен печат
