По вчерашниот протест во неколку градови во Македонија, каде протестираа граѓани кои не се согласуваат со рестриктивните мерки за невакцинираните и за кои сметаат дека претставуваат повреда на човековото право и дискриминација со реакција излегоа од Асоцијацијата на специјализанти и млади лекари. Од организацијата го осудуваат говорот на омраза кој бил забележан кај дел од демонстрантите, и се заканија дека и тие ќе излезат на улица доколку не бидат заштитени правата на лекарите, па ги повикаа Лекарската комора и Министерството за здравство соодветно да дејствуваат.
„Најостро го осудуваме говорот на омраза кон докторите и сите здравствени работници кои и со живот го платија лекувањето на пациентите болни од Ковид. Ја повикуваме Лекарската Комора да си ја врши својата работа и да ги заштити сите наши колеги, а Министерство за здравство да ги заштити сите вработени. Доколку било кој наш колега биде нападнат или вознемирен од толпата која протестира ќе прекинеме да лекуваме и ние ќе излеземе на улица“, велат од АСМЛ.
Инаку, дел од коментарите на протестот кои беа забележани се дека според дел од граѓаните кои протестираа, докторите биле убијци, а новинарите биле платеници. Според нив, вакцините биле експеримет, се заканија дека ќе продолжат со протести а доколку се формира Здружение ќе покренат и судски постапки.
