Од денеска стапуваат на сила новите рестриктивни мерки кои Владата ги воведува како заштита од корона вирусот во време кога стапката на вакцинирани се уште не е доволна за колективен имунитет, бројот на заразени расте а болниците се полнат. Сепак, новите рестрикции ќе бидат погубни за туристичката сезона, економијата и угостителскиот сектор – реагираат угостителите и туристичките работници.
Во шпицот на туристичката сезона засега и во земјата и во регионот сè се одвива според очекувањата на туристичките агенции и на угостителите. Но, соочени со доаѓањето нов бран ковид-19 тие најверојатно ќе бидат принудени да воведуваат ригорозни заштитни мерки. Тоа ќе ги урне надежите дека сезоната ќе биде толку успешна за да ја надокнади ланската загуба.
– Туристичката сезона не е ни приближно успешна како претходните години. Не очекувавме веднаш да биде сјајно, но навистина е тешко. Луѓето се финансиски истрошени, во сите дејности примањата беа или се уште се намалени, буџетот за одмор е намален, а капацитетите во туристичките објекти се поскапи, затоа што имаа голем пад на приходите во 2020 година – вели Марија Јовановска од туристичката агенција „Травити“ за Слободен Печат.
Од денеска во отворените делови на рестораните и објектите каде што присуствуваат над 30 лица ќе можат да влегуваат само оние со потврда за примена барем една доза вакцина.
Сепак, премиерот Заев вчера најави дека на денешниот состанок на Кризниот штаб ќе се разговара за воведување и некои дополнителни мерки како што се ПЦР тест за влез во угостителски објект наместо прва доза, додека граѓаните не се имунизираат. И министерот за економија Крешник Бектеши, најави дека е можно воведување ПЦР тест кој би важел дури 14 дена. Останува да видиме, дали мерките кои се на сила ќе бидат дополнети денеска по состанокот на Кризниот штаб.
