Министерот за здравство Венко Филипче и премиерот Зоран Заев ја промовираа националната кампања за вакцинација која гласи „За моментите на среќа! Вакцинирај се!“. Владата конечно започна кампања за вакцинација.
„Сите вакцини се безбедни и само со вакцинација ќе го сочуваме колективното здравје. Ова е единствениот начин да почнеме да живееме без ограничување, Така ќе имаме извесна иднина, ќе ја кренеме економијата, ќе ги одмориме лекарите. Вакцините се единствениот начин да спречиме губење на човечки животи“ – изјави премиерот Заев.
Според него, само со имунизација може да го вратиме спокојот и нормалното живеење, а им упати порака на антикваксерите.
„Ќе им упатам порака на антиваксерите – протестот е уставно право, ама исто така и јавното здравје е уставно право. Фактот што дури 90% од новозаразените се невакцинирани, и исто толкав процент од хоспитализираните е показател дека вакцините се ефикасни и безбедни. Обврска на државата е да го штити јавното здравје , затоа мора да го вратиме животот во нормала“ – додаде Заев.
