Еколошка катастрофа и се заканува на реката Црн Дрим. Нередовното и лошо функционирање на колекторот во Ложани, Струга, нанесува огромна штета врз еко системот на реката Црн Дрим, а ова што се случува последниве денови е алармантно.
Како што може да се забележи од видеата и како што сведочат мештаните од оваа област, отпадните води, фекалиите од колекторот се влеваат точно во реката, по што се шири непријатна миризба а нивото на загаденост на реката во овој дел е се повисоко.
Претходно екологистите алармираа дека нередовното функционирање на колекторот во Струга во текот на последните години нанесува огромна штета врз еко системот на водите во неколку општини во југозападниот регион на нашава земја. Оваа оценка беше изнесена на една конференција што се одржа во Дебар на која учествуваа граѓански здруженија од Дебар, Струга, Вевчани и други општини од овој регион. Констатирано е дека нередовната работа на колекторскиот систем ја загадува реката Црн Дрим и сите други реки и притоки, како и двете вештачки езера.
