Независната кандидатура на Максим Димитриевски за градоначалник на Куманово не може да биде најдобрата опција за кумановци, велат од СДСМ и додаваат дека наскоро ќе го соопштат нивниот кандидат и советничката листа за локалните избори во октомври.
„Потегот на Димитриевски го олеснува изборот на граѓаните. Тој што им врти грб на граѓаните, на поддржувачите на демократската и прогресивната опција, на членството и базата на СДСМ, не може да биде најдобра опција за кумановци. За СДСМ, интересот на граѓаните на Куманово бил и секогаш ќе биде пред интересот на Максим Димитриевски или било чиј друг личен интерес“,
реагираат од СДСМ.
Димитриевски од денеска ја отпочна процедурата за собирање на потписи за да поднесе независна кандидатура за втор градоначалнички мандат. Тој најави дека во текот на денот ќе каже повеќе детали околу кандидатурата.
