Откако не ја доби поддршката од СДСМ за уште еден мандат, актуелниот градоначалник на Куманово, Максим Димитриевски реши да оди самостојно како независен кандидат.
Од СДСМ кои за Куманово го кандитираа, Оливер Илиевски, секретар на општинската организација на партијата соопштија дека потегот на Димитриевски го олеснува изборот и дека тој што им врти грб на поддржувачите, на членството и базата на СДСМ, не може да биде најдобра опција за кумановци.
Тој пак одговори дека не врти грб и дека нема да дозволи да биде составен дел на одредени политички интриги на поединци.
Но, покрај тоа што не е кандидат на СДСМ, тој е и исклучен од партијата..
Генералниот секретар на партијата Љупчо Николовски, денеска промовирајќи го новиот кандидат за Куманово, рече дека Димитриевски сам се исклучил од партијата.
Од СДСМ нема засега официјален одговор кој партиски форум ја донел одлуката за исклучување на Димитриевски, односно дали тоа се случило на синоќешната седница на Извршниот одбор. Сепак, високи партиски извори потврдуваат дека исклучувањето е завршена работа.
„Согласно статутот на СДСМ, со ваквата одлука на Димитриевски автоматски се исклучува од членството во СДСМ“, велат од партиското раководство за „360 степени“.
