Зоран Милевски-Кичеец од вечерва се наоѓа во истражниот затвор Скопје, откако му беше одреден 30 дневен притвор, за учество во сообраќајка со смртни последици.
Она што предизвика дилеми во јавноста е дали на Кичеец, иако издржува затворска казна, која во моментот му е во прекин, истовремено може да му биде одреден притвор?
Фокус” разговараше со повеќе правници, па според едни притворот е незаконски, а според други ваквата мерка е можна и оправдана.
Според адвокатот Александар Тортевски, досега имало вакви спорни случаи, посочувајќи го примерот со Јован Вранишковски.
– Мислам дека притворот е незаконски. Ако е на издржување на казна затвор, тој не може ниту да бега, ниту да го повтори делото ниту да влијае на сведоци. Кога има нова постапка, по дифолт се укинуваат сите привилегии на осудено лице. Нема викенди, прекини, работа надвор…, вели Тортевски.
Друг адвокат со кој контактираше “Фокус” пак вели дека околноста што Кичеец бил во отворено одделение и имал прекин на казната, значи дека може да му се изрече или притвор или судијата задолжен за активната казна да го стави во затворен дел да ја издржува казната.
Став побаравме и од обвинител, кој исто така неофицијално посочува дека притворот во ваква ситуација е можен, додека да му продолжи издржувањето на казната.
-Најчесто за вакво дело не се одредува притвор, освен ако не станува збор за странец, но тука влијаело тоа што осомничениот имал прекин на затворската казна, вели нашиот соговорник.
Кичеец на 9 септември требаше да се врати во отвореното оделение во затворот во Струга, по 30 дневниот прекин даден за лекување. Тој оздржува 3-годишна затворска казна за случајот “Рекет”.
Извор:Фокус
