Претседателот на Собранието Талат Џафери во разговор за ТВ21, рече дека нема да ја стави во процедура предлог-одлуката на ВМРО-ДПМНЕ за разрешување на министерот за здравство Венко Филипче и неговиот заменик Илир Хасани со гласање во заканодованиот дом. Според спикерот, опозицијата може да предложи само интерпелација, но не и предлог-одлука.
Според Џафери, членот 184 се однесува на законодавна постапка во делот донесување одлуки, декларации, резолуции, но на никој начин тоа не може да биде разрешување, додавајќи дека постапката кај член 184 се покренува во фаза на второ читање.
Претседателот на ВМРО-ДПМНЕ, Христијан Мицкоски, на денешната прес-конференција, објави дека во вторник кога има редовна седница во Собранието, опозициската партија ќе достави предлог за разрешување на министерот за здравство Венко Филипче и заменик-министерот Илир Хасани.
Двајцата функционери ги депонираа оставките по пожарот во тетовската модуларна болница, но премиерот Зоран Заев не ги прифаќа засега и вели дека прво треба да заврши истрагата. Тоа за ВМРО-ДПМНЕ е само игра пред јавноста.
„Првиот чекор е до вторник рано претпладне е рок кој им го даваме на министерот и другите да ги достават до Собранието. Има закажана нова седница за истиот ден. Доколку не бидат доставени, ќе поднесе предлог-одлука до Собранието за разрешување на министерот и предлог-заменикот“, рече Мицкоски.
