Пет годишно дете од тетовска Мала Речица е тешко повредено од бездомни кучиња и поради тоа има рани од каснувањето по цело тело, од главата па се до стопалата. Нападот се случил вчера претпладне, а околу 13 часот и 40 минути во СВР Тетово каснувањето го пријавил неговиот 57 годишен дедо, пренесува Сител.
Семејството реагира на тоа што во тетовската Клиничка болница детото ја нема добиено вакцината против беснило која се дава при каснување од куче. Детото било однесено денеска во Скопје за да ја прими вакцината.
-Беше 10.30 часот пред портата кога го нападнале цел чопор на кучиња. Среќа што соседот успеал да ги избрка некако. Има каснување на цело тело, на око, на уше, на грбот, на раце и нозе, по телото. Не можев да го подигнам од што го болеше секаде. Во болница имаше шиење посебно на око, па кај друг лекар за лице, па друго место за грбот. Прими само една вакцина, а за другата против беснило мора да одиме во Скопје затоа што овде ја нема, изјави мајката Валбона Мемети.
Детето добило антитетанус, инфузија и антибиотици, а во болничкиот извештај стои дека е консултиран инфектолог за антирабиес превенција. Потоа и дека се упатува на Клиниката за инфективни болести во Скопје, стои напишано на лекарскиот извештај.
Од раководството на тетовска клиничка болница доставија документ – договор за набавка, со кој тврдат дека има набавено таква вакцина и серум против беснило, но немаа одговор зошто детето за тоа е пратено во Скопје.
