Не стивнуваат реакциите на социјалните мрежи, но и партиските реакции, по нападот на претседателот на Регулаторната комисија за енергетика, Марко Бислимовски, од сопственикот на компанијата У повер и син на Муса Џафери, Аријант Џафери.
Со реакција на социјалната мрежа фејсбук се јави лидерот на Левица, Димитар Апасиев.
„Се молат функционерите на ДУИ да не ги тепаат функционерите на СДС“, напиша апасиев на фејсбук.
Со реакција се јави и ВМРО-ДПМНЕ.
„Власта започнува физички да се пресметува помеѓу себе, што значи дека го губат тлото, се зголемува нервозата и знаат дека ќе загубат. Кога ДУИ и СДСМ ќе се договорат за 14 изгорени луѓе од Тетово, сложно викаат декса крив е кабелот, кога не може да се договорат за бизниси, делат тупаници среде Скопје ксако Бислимовски и синот на Џафери“, се вели во соопштението на ВМРО-ДПМНЕ.
Од партијата потсетуваат дека Марко Бислимоски е поранешниот член на партиската комисија за енергетика во СДСМ. Муса Џафери, чиј што син дели тупаници низ Скопје е функционер во ДУИ.
„Ваквото делење тупаници среде главниот град е срам за државата. Обвинителството да ги повика да кажат што делат, и што множат двајцата од власта. Да се истражи не само тепачката, туку и мотивите за тепачката. Ова е брука за институциите“, велат од опозициската партија.
За нападот потврди МВР, а вицепремиерот Љупчо Николовски најави дека го осудува чинот и се постапува по случајот. Од РКЕ нагласија дека и натаму ќе продолжат да функционираат во насока на заштита на потрошувачите.
