Иван Камчев од село Дедино, Радовишко, ни се обрати за помош за решавање на проблемот со кој се соочува. Се обидува да дознае каде треба да се обрати и кој е одговорен за поставување на како што вели тој нелегална жица од која се повредува добитокот што пасе во близина. Како што ни кажа Иван, има узурпација на 100 декари државно земјиште кај езерото Мантово, кое е оградено со нелегално поставена жица на која се повредуваат кравите кои пасат на пасиштето.
„Кравата е исечена од таа жица што се гледа на сликата и самите можете да видите дека тоа е жица што е забранета законски. Местото се наоѓа на езеро Мантово, а човекот има заградено 100 декари државно место кое се води како пасиште за стока. Кравата беше сета исечена и не можевме да ја спасиме и веќе оваа е четврта крава така што се повредува. Никој не сака да ни помогне, се обративме во неколку институции и сите велат дека тоа не било нивна работа. Затоа ве замолувам ако можете да ни помогнете да се отстрани оградата поради која страда стоката“, вели Иван.
