Лидерот на ВМРО-ДПМНЕ, на митинг во Македонска Каменица, ја обвини власта за хипокризија, посочувајќи дека, додека една клика се богати, џебовите на народот се празнат
Инфлацијата го јаде семеејниот буџет, додека џебовите на обичниот народ се празнат, џебовите на власта, на таа тесна клика која се добрала до власт, постојано се полнат, рече Мицкоски, на денешниот митинг во Македонска Каменица.
Тој посебно се осврна на флаер што го испечатиле социјалдемократите, а на кој пишувало „НАТО, попис – честитки народе“, демек, како што рече, завршена работа.
„Сакам да ви пренесам една порака која ја видов вчера на социјалните мрежи, а која крие во себе длабока вистина, која најдобро ја отсликува хипокризијата на моменталната пропаганда на власта, за тоа колку отсутно делува нивното фалење по медиумите за работите кои не се решение за проблемите на граѓаните. Испечатиле СДСМ некаков флаер со пораки НАТО, попис… Ама досетливиот народ ја раскажал голата вистина на социјалните мрежи, па таа порака, чија намена е да се пофалат, ја гледаме фотографирана во фрижидер, арно ама фрижидерот празен. И морам да кажам убав флаер, ама какво фајде од такви фалби ако фрижидерот е празен. Не го говорам ова за да релативизирам тоа што сме членка на НАТО, но тоа што фрижидерите на народот им се празни е главната болка која сите нас не тишти“,
рече Мицкоски.
