Како што може да се забележи на видеото што го објави Владата, Заев учествуваше во пренесувањето и монтажата на материјалите, а со батериска штрафилица дури и заштрафи еден од панелите, па со фломастер се потпиша под панелот за да се знае дека лично тој го има монтирано.
Денеска, премиерот Зоран Заев, облечен во работно одело и со шлем на главата на кој пишуваше „Mr. Prime Minister Zoran Zaev“, им се приклучи на работниците во Термоелектраната Осломеј во Кичево, каде што се одвиваат градежните активности за изградбата на првата фотоволтаична електрана од 10 мегавати во сопственост на Електрани на Северна Македонија (ЕСМ).
Потоа, во изјава за медиумите, Заев рече дека капацитети за производство на чиста и зелена енергија се градат на местата на некогашните загадувачи.
– Поранешните наоѓалишта на јаглен во РЕК „Осломеј“ за неколку месеци треба да бидат покриени со 10 мегаватна фотоволтаична електрана. Вкупното годишно производство од оваа нова фотоволтаична електрана ќе изнесува 15-17 гигават-часови, доволни за потребите на околу 2.800 домаќинства – рече Заев.
