Актуелниот градоначалник Петре Шилегов вели дека Скопје не е листа за желби, бидејќи во јавниот превоз има и приватници кои мора некако да егзистираат. Независната кандидатка поддржана од ВМРО-ДПМНЕ, Данела Арсовска смета дека ваквиот принцип на превоз е изводлив и покрај загубите со кои што работи ЈСП.
-Ќе треба да им објасниме на такси превозниците и на приватните сопственици на автобуси кој ќе ги плаќа и како ќе бидат платени, таму има и сопственици на повеќе автобуси, тоа е еден систем кој што е сериозно сложен, вели Шилегов.
-Ние мораме добро и квалитетно да ги менаџираме јавните претпријатија за тие да покажат резултати. Јавното сообраќајно претпријатие мора да биде оддржливо, а ќе биде одржливо со квалитетно, ефикасно менаџирање на процесите и на се она што е стварно важно, вели Арсовска.
И двајцата кандидати и денеска вообичаено продолжија со изборната агенда. Шилегов ја најави изградбата на отворена бина во градскиот парк, додека пак фокусот на Арсовска беше аерозагадувањето.
-Овој процес го започнавме веднаш по започнувањето на пандемијата, Град Скопје беше првата европска метропола со кризни мерки за културата во насока на егзистенцијата на скопските уметници, но и првата метропола што организираше цели фестивале сред пандемија, дури и во карантин, вели Шилегов.
Планирано е офорумување на зелен совет, тој ќе биде составен од експерти за животна средина и претставници на невладиниот сектор каде што ќе се разгледуваат сите прашања од областа на екологијата и од областа на урбаниот хаос кој што во моментов владее во Скопје, вели Арсовска.
Шилегов и денеска ја повика Арсовска на дуел за да ги соочат концептите јавно пред скопјани, оти како тоа е основно демократско начело. Арсовска и понатаму одбива, чекајќи извинување за како што вели обидот за нејзина дискретитирање во изборната кампања.
Извор: Канал5
