На социјалната мрежа „Тик-ток“ често се појавуваа видеа кои ги споделуваат млади и со кои се фалат како може да се направи лажен сертификат за вакцинација од корона вирус. Таков е и случајот, каде младо момче објави такво видео, но по извесно време неговиот профил беше избришан од оваа социјална мрежа. Факт е дека тоа го прават за да можат да ги уживаат привилегиите на вакцинираните, кои, согласно новите мерки можат да влегуваат во ресторани, кафулиња, трговски центри – наспроти невакцинираните за кои рестрикциите се на сила, а од вчера надлежните ги заострија мерките – да може да се влегува само со две дози вакцина или прележан Ковид-19 во последните 24 часа.
Дека младите неретко прават лажни сертификати постојано предупредуваат лекарите, кои повикуваат на поголема ажурност на инспекциските служби. Микробиологот д-р Никола Пановски предупредува дека младите влегуваат во ресторани и со туѓи сертификати.
„Луѓето, особено младите се снајдоа, имаат сертификати од други лица и слободно влегуваат каде сакаат. Четири месеци имунизирани со една доза влегуваа секаде иако немаа развиено имунитет во првите две недели по прием на дозата. Со самото тоа што сертификати добиваа лица кои немаа развиено имунитет, таа мерка немаше медицинска оправданост. Дури сега добива медицинска оправданост. Се разбира тие што примиле прва доза, веројатно примиле и втора. Затоа сметам дека за оние што до сега не се имунизирале, оваа мерка нема да има ефект, односно нема да ги натера да примат прва доза сега, ако до сега не примиле“ – вели Пановски.
