Граѓаните треба да платат по 15 денари за едно пластично ќесе доколку не сакаат во раце да ги носат доматите, пиперките или јаболките. Најголеми реакции за таканаречените пиљарски ќеси, доаѓаат од постарите лица, кои најчесто купуваат на парче зеленчук или овошје. Дел од купувачите, прашуваат каде е математиката ако за „две-три главици кромид, кои чинат 10 денари, треба да платат 15 денари“?
Од Организацијата на работодавачите за „Слободен печат“, велат дека и до нив стигнале поплаки од трговците во врска со забраната за употребата на овие ќеси, па оттука и нивниот став е дека е неопходна измена во Законот за управување со пакување и отпад од пакување, или одложување на неговата примена.
Иницијативата е покренатa од причина што примената на овие кеси е многу ограничена (се работи за мали количества кеси), односно се работи за ќеси кои се користат за мерење на овошје и зеленчук и во овој краток период компаниите од трговијата имаат проблем за воведување на нивна замена – велат од ОРМ.
Тие сметаат дека треба да се одложи нивната примена до 1 јануари 2023 година година или да се промени став 1 од член 10 и да гласи: Се забранува пуштање на пластични ќеси за носење на стоки на пазарот во Република Северна Македонија, со исклучок на многу лесните пластични ќеси за носење на стоки (ќеси за овошје и зеленчук – ќеси за размерување на рефусна стока ).
Министерот за животна средина Насер Нуредини, пак им порача на граѓаните да користат платнени торби за пазарење, појаснувајќи дека за кесите за ѓубре засега нема промена на цената.
